TÓNLISTAFÓLK: Elin & Kári
(Elin Brimheim Heinesen & Kári Linderoth Jacobsen)
ÚTGÁVUDAGUR MC: Mikudag, 20. juli 1988
ÚTGÁVUDAGUR CD: Mánadag 20. juli 1998
Tveymansbólkurin Elin & Kári var stovnaður í 1984, og summarið 1988 gav bólkurin út teirra fyrstu og einastu heildarútgávu, rópt NALJA, sum skuldi vísa seg at gerast týðandi partur av tónleikasøgu Føroya. Tey bæði skrivaðu tekstir, gjørdu løgini og løgdu allan tónleikin til rættis, men kendi føroyski tónleikaframleiðarin, Óli Poulsen, hjálpti teimum at framleiða, tónablanda og mastra útgávuna. Útgávan var fyrst bara útgivin sum kassettuband og var útseld eftir hálvumøðrum ári. Eftir nógvar fyrispurningar, var útgávan endurútgivin á fløgu í 1998, hesaferð við einum eykalag.
LURTA EFTIR ÚTGÁVUNI HER:
GEV GÆTUR! Rulla longur niður á síðuni fyri at lesa sangtekstirnir, meðan tú lurtar eftir útgávuni.
HÚSIN TIL KASSETTUBANDIÐ – MC:
HÚSIN TIL FLØGUNA – CD:
ELIN & KÁRI HITTAST
Í 1984 møttust Elin og føroyska tónaskaldið og framleiðarin Kári Jacobsen á einari veitslu á ólavsøku. Elin var 26 ára gomul tá, og Kári bara 16! Hóast tíggju ár vóru á muni millum teirra, og tey komu frá sera ymiskum tónleikabakgrundum, funnu tey út av, at kemiin teirra millum var sera góð. Kári hevði gjørt eitt demo-kassettuband við løgum hjá sær, og bað Elina um at syngja okkurt av løgunum. Elin hevði eisini gjørt onkur poppløg í sínum lag, og tey funnu út av, at her høvdu tey okkurt til felags. Hetta var byrjanin til eitt samstarv, sum úrslitaði í NALJA útgávuni, sum kom í 1988.
Her er ein mynd av Elini & Kára frá júst tí veitsluni, har tey møttust fyrstu ferð:
EIN VÆL UMTÓKT ÚTGÁVA
Í 1988, var – nú søguliga – útgávan Elin & Kári: NALJA givin út við løgum, sum skuldu vísa seg at gerast sera væl umtókt, so sum: Á tann deiliga Havn, Sjeikurin, Hygg at mær og Eitt dýpi av dýrari tíð.
NALJA tveymansbólkurin, sum vóru Kári Linderoth Jacobsen og Elin Brimheim Heinesen, skrivaðu sangtekstirnir, gjørdu løgini og løgdu tey øll løgini á útgávuni til rættis, meðan Óli Poulsen hjálpti teimum við framleiðsluni, tónablandi og mastring.
10 løg vóru á útgávuni. Fimm eftir Kára Linderoth Jacobsen og fimm eftir Elina Brimheim Heinesen. Næstan øll løgini hava verið hitt og eru spæld nógv í føroyskum útvarpsrásum. Og tað sær út til at halda fram, tí so gott sum allir 10 sangirnir verða enn spældir aftaná øll hesi árini, síðani teir vóru at hoyra fyrstu ferð í 1988. Hvør einasti føroyingur kennir løgini.
“SIGN OF THE TIMES”
Men hvat merkir so orðið “nalja”, vilja nógv fólk vita. “Nalja” er eitt føroyskt slang-orð, sum var uppi í tíðini í 80’unum. Tað er ein samandráttur av setninginum: “Nei, eg lúgvi alt” ella “Nei, ordiliga”, sum so nøkurlunda merkir: “Eg veit, at hetta ljóðar sum skemt”.
Í eini samrøðu, sum varð gjørd við Elina & Kára um ta tíðina, tá tónleikur teirra varð givin út, vórðu tey spurd, hví tey høvdu valt at kalla útgávuna so, og tey svaraðu, at tey fegin vildu hava, at útgávan onkursvegna skuldi lýsa tíðina, tey livdu í – og tað ráðandi rákið í tíðini.
“Vit liva í eini postmodernaðari tíð, har fleiri og fleiri orð tykist at tømast fyri meining. Nógv orð og úttrykk hava verið søgd so ofta í bókum og filmum, at tey eru vorðin klisjéir. So fólk nú á døgum hava ilt við at úttrykka seg sjálvi og teirra kenslur, tí tá tey fegin vilja siga nakað, sum tey meina í álvara, t.d. “Eg elski teg”, so eru tey vorðin so stúrin fyri, at tað skal ljóða sum ein tóm klisjé – sum um tey ikki meina tað, sum tey siga – so tað gerst sera torført bara at siga hesi orðini. Men um vit siga, “Eg elski teg” og so siga “nalja” beint aftaná, so kunnu vit á ein hátt úttrykkja, at vit eru greið yvir at hasi orðini – “Eg elski teg” – ljóða sum ein klisjé. Og harvið kunnu vit – á ein løgnan, viðvendan hátt – fáa boðskapin ígjøgnum kortini, at vit í roynd og veru meintu tað, sum vit søgdu, hóast vit júst gjørdu tað til einkis við at siga “nalja” aftaná – um tú skilir, hvat eg meini við. Tað er í slíkum støðum, at orðið “nalja” kann vera gagnligt. Hetta er ein typisk andsøgn fyri okkara postmodernaðu tíð.”
Her er ein mynd av Elini, Óla og Kára í Bløndal Studio í Keypmannahavn:
NALJA bólkurin spældi nógvar liva konsertir síðst í áttatiárunum og fyrst í nítiárunum – m.a. á væl umtóktu ólavsøkukonsertunum, men so var friður um tey í um 20 ár. Elin & Kári høvdu ætlað sær at geva út næstu NALJA útgávuna í 1992, men júst tá blivu Føroyar raktar av eini sera álvarsligari fíggjarkreppu, og tað var ógjørligt at útvega nóg nógva fígging til at framleiða útgávuna. Eftir hetta fingu tey ov mikið at gera hvør sær og fóru hvønn sín veg. Tí kom onnur útgávan hjá NALJA ongantíð út.
Myndir av Elini & Kára í Dimmalætting um ta tíðina í 1988, tá tey góvu NALJA út:
Mynd av Elini & Kára í blaðnum 14. September um ta tíðina í 1988, tá tey g´vou NALJA út:
Í nítiárunum merktu Elin & Kári ein vaksandi eftirspurning eftir NALJA-útgávuni á fløgu, av tí kassettubandið var útselt eftir minni enn tveimum árum. Fólk brúktu ikki kassettuavspælarar longur, og tey fólkini, sum høvdu keypt NALJA-bandið í áttatiárunum høvdu slitið tað upp. Nógv fólk spurdu tí Elina & Kára, um tey ikki kundu geva útgávuna út aftur – hesaferð á fløgu, tí tey vildu fegin keypa fløguna.
So eftir nógvar fyrispurningar varð gjørt av at endurútgeva NALJA útgávuna á fløgu á sumri í 1998 sum ein fagnað av, at útgávan fylti 10 ár. Tað var plátufelagið TUTL, sum endurútgav NALJA á fløgu. Á fløguni vóru teir tíggju gomlu sangirnir + eitt eykalag.
Elin & Kári tá tey endur-útgóvu NALJA í 1998:
NALJA BÓLKURIN ENDURSKAPTUR
Í 2012, 20 ár eftir at NALJA-bólkurin spældi teirra seinastu konsertframførslu, spurdu fyrireikararnir av Faroe Pride, um Elin & Kári vildu stuðla LGBT og spæla á Faroe Pride konsertini sama ár. Tað vildu tey fegin, og soleiðis bar í bandi, at tey bæði stóðu á palli aftur saman fyrstu ferð í 20 ár við neyvt somu manning, sum tey spældu teirra seinastu konsert saman við í nítiárunum. Sostatt var NALJA-bólkurin endurskaptur.
Júst hetta árið sleyg Faroe Pride met í mun til talið av luttakarum í skrúðgonguni, tí hetta var fyrsta árið, at fleiri túsund fólk møttu. NALJA bólkurin spældi eina sera væl eydnaða konsert fyri fleiri túsund fólkum, sum høvdu tað stuttligt, dansaðu og sungu við til sangirnar – bæði ung og gomul. Sjálvt blaðung fólk, sum ikki vóru fødd, tá NALJA kom út í 1988.
Fyri Elina & Kára var hetta rein nostalgi.
Her er ein sjónbandaupptøka frá NALJA konsertini á Faroe Pride í 2012:
Nakrir av Føroya kendastu og dugnaligastu tónleikarum spæla vanliga saman við Elini & Kára á konsertunum: Finnur Hansen á ljómborði, Rógvi á Rógvu á trummum, Arnold Ludvig á bassi og Leivur Thomsen á gittar.
PLETTSKOTIÐ FRÁ 1988
31. oktober 2015 var kassettubandið NALJA temaplátan leygarkvøldssendingini ‘Plátubarrin’ hjá Jákupi Magnussen, sum nevndi sendingina “Plettskotið í poppi frá 1988”.
Soleiðis stendur á kringvarp.fo um sendingina:
“Útgávan NALJA hjá Elini og Kára var Temapláta í Plátubarrini 31.10.15. Talan er um eitt kassettuband frá 1988, ið var tað mest ungdómstrúgva føroyska popppalbumið í áttatiárunum. Harumframt hava tey sangir við, sum í breiðari merking kunnu kallast allramannaogn. Kend løg á Nalju eru “Á, Tann Deiliga Havn”, “Eitt Dýpi Av Dýrari Tíð”, “Sjeikurin”, og “Livandi Ljós”.
Greitt verður frá frá ymsum søgum í samband við Nalju, sum Kári Jacobsen og Elin Heinesen skrivaði hvør síni fimm løg til. Vit spæla níggju av hesum tíggju løgunum.
Elin og Kári vóru ávikavist 26 og 16 ára gomul, tá tey hittust í 1984, og góða kemiin teirra millum endaði so við hesari úgávu í 1988. NALJA er ein av teimum best grundfestu poppvarðunum á leiðini, tí lættu sangirnir verða endurinnspældir, umframt at kór og orkestur á sín hátt endurgeva tilfar av útgávuni.
Jákup Magnussen leggur til rættis.”
Sendingin kann hoyrast her:
https://kvf.fo/platubarrin?sid=48381
9. mars 2024 var ‘NALJA’ hjá Elini & Kára aftur temapláta í leygarkvøldssendingini ‘Plátubarrin’ hjá Jákupi Magnussen, men hesaferð var eisini prát við Elina um verkið.
Soleiðis stendur á kringvarp.fo um sendingina:
“NALJA útgávan var væl umtókt millum fólk í Føroyum síðst í 80’unum – ikki bara tí hetta var ein útgáva við góðum sangbærum poppløgum, sum fólk kundu dansa til, men eisini tí útgávan rakti beint niður í tíðarandan tá. Hesi árini fóru nakrar kollveltandi rembingar fram í hugburðinum hjá ungum fólki – rembingar, sum løgdu lunnar undir samfelagið, sum tað er í dag, har fólk hava størri frælsi til at líkjast búrtur úr fjøldini og kunnu liva meira alternativar lívsstílar.
NALJA-útgávan hevði heilt klárt bæði eitt feministiskt og eitt ‘gay rights’ element í sær, hóast Elin og Kári søgdu seg ikki at hava politiskar intentiónir við útgávuni Men staðfestast kann, at tey stóðu púra einsamøll og unik á føroyska mentanarpallinum sum ein kvinna og ein samkyndur maður, har Elin eisini var komponistur og framleiðari á jøvnum føti við Kára og Óla Poulsen, ið var hann sum tónablandaði og t.d. stóð fyri trummuprogrammeringum.
Bæði Kári og Elin programmeraðu og arrangeraðu sjálvi tað mesta av tónleikinum, áðrenn tey fóru í studio. Tað var avgjørt ikki vanligt at síggja í Føroyum tá í tíðini, at kvinnur brúktu teldur til at komponera og arrangera tónleik við, sum Elin gjørdi.
Tíðin og umhvørvið í Føroyum var tá – sæð við nútíðar brillum – sera mansdominerað og homofobiskt. So uttan at tað sum so var ætlanin, so koma vit ikki uttan um, at NALJA-útgávan eisini á tí økinum var rættiliga serstøk.”
Elin Brimheim Heinesen og Kári Linderoth Jacobsen manna Nalju-duettina, sum seint í fýrsunum gjørdu Temaplátuna, ið var tann best umtókta føroyska útgávan við ungdómspoppi tað tíggjuáraskeiðið. Til dømis kallaði Kári sjálvur eitt annað av hittunum, Ansa eftir, fyri: “eitt diskotekslag eftir urbanum leisti”.
Talan var millum annað um ávirkan frá ensku Depeche Mode, Yazoo, Erasure, Howard Jones, og øðrum, eins og aðrir stílar sum rokkur, bossanova, og jazzur høvdu ávirkan á verkið. Tey bæði vildu gera kvalitetspopp, hava tey sagt seinni. Samtíðarsynthezisarin merkti útgávuna: nógv, kann sigast, men samstundis er hon sera melodiskur felagssangur, so hon livir framvegis væl – og hon hevur eisini nakað føroyskt yvir sær.
Talan var um eitt kassettuband, útgávudagurin var 20. juli 1988. Tíggju ár seinni var NALJA útgávan aftur tøk – hesaferð sum fløga – við bonuslagnum Heimlongsul, ið lýsir støðuna hjá føroyingum í útlondum, sum altíð kenna ein drátt mótvegis Føroyum, fólki, mentan, og náttúru.
Útgávan var fyri níggju árum síðan Temapláta í Plátubarrini. Tá var onki gestaprát, meðan í sendingin hesaferð er ein ferð gjøgnum verk og tíð saman við Elini Brimheim Heinesen.
Plátubarrin 9. mars 2024
Sendingin kann hoyrast her:
https://kvf.fo/platubarrin?sid=171952
ELIN & KÁRI UM NALJA Í SJÓNVARPINUM
Her er brotið um NALJA úr sjónvarpssendingarrøðini í 13 pørtum “Minnist tú enn”, sum Suni Merkisstein gjørdi um poppsøguna í Føroyum. Fimm partar vóru sendir í Kringvarpi Føroya í 2010 og restin í 2013. Søgan um NALJA varð søgd í 9. parti (frá 7:26 til 19:55):
SKERINGAR Á ÚTGÁVUNI
1. Á, tann deiliga Havn (Kári Linderoth Jacobsen)
2. Sjeikurin (Elin Brimheim Heinesen)
3. Loyndarmálið (Elin Brimheim Heinesen)
4. Hygg at mær (Kári Linderoth Jacobsen)
5. Eitt dýpi av dýrari tíð (Elin Brimheim Heinesen/Jens Pauli Heinesen)
6. Ansa eftir (Kári Linderoth Jacobsen)
7. Livandi ljós (Kári Linderoth Jacobsen)
8. Eydnan (Elin Brimheim Heinesen)
9. Øgiliga væl (Elin Brimheim Heinesen)
10. Aftaná (Kári Linderoth Jacobsen)
11. Heimlongsul (Kári Linderoth Jacobsen/Elin Brimheim Heinesen)
SKERINGAR:
1. Á, TANN DEILIGA HAVN
Lurta her:
Orð, lag, ljóðføri, útseting: Kári Linderoth Jacobsen
Sangur: Kári Linderoth Jacobsen, Elin Brimheim Heinesen
Kór: Elin Brimheim Heinesen
Saxofon: Allan Tyson
Synth trummur, tónabland, mastering: Óli Poulsen
ISRC FRX871512203
Sangtekstur:
Á TANN DEILIGA HAVN
Tað er einaferð um árið, at Ólavsøka er
Tá liva allir føroyingar í aðrari verð
Úr øllum herðashornum tysja fólk til Havnar bý
Hýrurin er góður, og eingin spyr um hví
Um sólin kemur fram, er tað jú bara gott
men eisini er stuttligt, um tað verður vátt
Snapsin undir møttilin, so fara øll avstað
Sjálvt Effersøe á Vaglinum, hann er í góðum lag
Á, tann deiliga Havn
Ólavsøkuhavn
á, tann deiliga Havn
øll syngja, á, deiliga Havn
Fullir menn og prædikantar syngja hvør sítt lag
Fólk við barnavognum, fólk, ið detta av á rað
kappróðurin liðugur og hoyrdi tú hvør vann
Tivoli og poppkorn og onkur maka fann
Mest spennandi um kvøldið er at leita sær á fund
í ljósinum frá littum lampum finna sær eitt sprund
Onkur verður móður, onnur tíma ei heim enn
Ghettoblásarar og føroysk klæði, alt í senn.
Uououou
Á, tann deiliga Havn
Ólavsøkuhavn
á, tann deiliga Havn
øll syngja, á, deiliga Havn
Frøast kunnu øll um, at Havnin hon er vár
Ólavsøkusiðurin skal liva ár um ár
Onga aðrastaðni í hesi viðu verð
er hýrurin so góður, sum tá Ólavsøka er
Á, tann deiliga Havn…
Á, tann deiliga Havn…
2. SJEIKURIN
Lurta her:
Orð, lag, ljóðføri, sangur, kór, útseting: Elin Brimheim Heinesen
Synth trummum, tónabland, mastering: Óli Poulsen
ISCR FRX871512204
Sangtekstur:
SJEIKURIN
Hon liggur har í seingini
við dýnu uppundir øs
Eg spyrji: Tú, hvat bagir tær,
tú gert meg heilt nervøs
hon svarar ikki fyrr enn eg spyrji
einaferð aftrat
so smílist hon so droymandi
og sigur: Veist tú hvat?
Tú skuldi hitt hann
Ein sjeik so fittan
Hann er lekrasta petti, sum finst her á jørð
Tað allarbesta
eg eri um at bresta
Um eg ikki skjótt síggi hann,
so verði eg ør
ja, eg verði púra ør
– so púra ør
Hon hoppar út út seingini
og dansar alt hon kann
í ørmunum ósjónliga
er dreymurin hon fann
Hon leggur ikki merki til mín,
tí hon er so glað
Hon dansar og hon syngur,
og eg sníki meg avstað
Tú skuldi hitt hann….
3. LOYNDARMÁLIÐ
Lurta her:
Music, lyrics, lead vocal, backing vocals, arrangement: Elin Brimheim Heinesen
Instruments: Elin Brimheim Heinesen, Kári Linderoth Jacobsen
Synth drums, mix, mastering: Óli Poulsen
ISCR FRX871512205
SANGTEKSTUR
EYDNAN
Hvat er tað, tú hevur har í tínum lumma?
Er tað nakað, sum eg kann síggja nú
Um tú tímir, ja, so vís mær ella gloym tað
nei, nei, eg skal ikki noyða teg tú
Jú, eg veit, tú hevur tíni loyndarmál
og gott er, soleiðis má tað vera,
eg eri bara forvitin, eg elski teg
sjálvt um tú kanst vera sera
trekur
bara tú onkuntíð letur upp
Góði, sig mær nú, hvat var tað, sum tú hevði
eg vóni enn eg kann sleppa at síggja nú
kom nú vís mær, um tú vilt, á, alt í lagi
nei, nei, eg skal ikki noyða teg tú.
Jú, eg veit, tú hevur tíni loyndarmál…
4. HYGG AT MÆR
Listen here:
Orð, lag, sangur, kór, ljóðføri, útseting: Kári Linderoth Jacobsen
Gittar: Vilhelm Thomsen
Synth trummur, tónabland, mastering: Óli Jacobsen
ISCR FRX871512206
Sangtekstur:
HYGG AT MÆR
Eg livi væl og júst í løtuni
gangi eg oman eftir gøtuni
Eg havi eitt ítriv, eg íðki
eg fasadu mína fríðki
hvønn dag, síggja tit tað
Eg veit væl av, at allur býurin sær,
at eg veit av, at tey hyggja at mær
Hygg at mær – eg síggi so væl út
havi onga sút
Eg vil vera nummar eitt og liva feitt
Innaní eri eg ein annar, enn eg eri uttaná
Tað kanst tú banna uppá
Eg keypi javnan klæðir
tí einki mær bagir
Klippi hár og reinsi negl
og vaski hár og klippi negl
og elski míni spegl
Eg havi eitt ítriv, eg íðki
eg fasadu mína fríðki
hvønn dag, síggja tit tað
Eg veit væl av, at allur býurin sær
at eg veit av, at tey kanska øvunda mær
Hygg at mær…
Men av og á kann sjálvt eg
niðurtúrar fá
tí skortur min einaferð
við tíðini kanska loysnar frá
5. EITT DÝPI AV DÝRARI TÍÐ
Lurta her:
Lag, sangur, kór, útseting: Elin Brimheim Heinesen
Orð: Jens Pauli Heinesen
Ljóðføri: Elin Brimheim Heinesen, Óli Poulsen
Synth trummur, tónabland, mastering: Óli Poulsen
ISCR FRX871512207
Sangtekstur:
EITT DÝPI AV DÝRARI TÍÐ
So verður sagt av monnum
at lívið er markleys neyð
eitt dýpi av gráum døgum
og børn, ið biða um breyð
Kanska er lívið sorgarlag
kanska er lívið gott
og kanska eg ein skínandi dag
beri kenslu av myrkari nátt
Í nátt er luftin so rein og klár
bládjúp og ísandi køld
foldin hvílir í hvítari tøgn
og norðlýsið reisir sær tjøld
Og vit mítt er fult av tonkum
á ferð út á víðan veg
at finna á miðleysu náttargongd
tann vísdóm, ið uggar meg
Men ongan vísdóm eg finni
ið sigur tey sonnu orð
Sum bløðandi fuglar falla tey
aftur at hvítari for
Tó eg veit at dýrgripir finnast
og fjalast við gráan eim
tá gentur og dreingir spenna
sum folar í dans og gleim
Tá barmur mín spentur av undran
av eydnu, av tungari trá
av iva og sorgarløgum
Eisini, eisini tá
:,: veit eg at lívið er gáva
eitt dýpi av dýrari tíð
sum øll skulu valla ígjøgnum
rekast og villast inní :,:
6. ANSA EFTIR
Lurta her:
Orð, lag, ljóðføri, útseting: Kári Linderoth Jacobsen
Sangur: Elin Brimheim Heinesen
Rap: Kári Linderoth Jacobsen
Synth trummur, tónabland, mastering: Óli Poulsen
ISCR FRX871512208
Sangtekstur:
ANSA EFTIR
Tað er fríggjakvøld, og enn ein arbeiðsvika liðug er
sum eg vil gloyma og hava út úr míni verð
Men nú kann eg leypa út í eitt lív
sum eg haldi er betri uttan rættiliga at vita hví
Tað er fríggjakvøld, og eg lívið liva vil
At sita heima alt kvøldið, tað er eitt verri skil.
Men nú kann eg stuttleika mær og møta fólki – Á ja!
Og kanska eg kann finna ein mann og siga við hann:
Kanst tú koma heim við mær í kvøld
tí eg eri køld
tú kanst hita meg
eg eri góð við teg
Ansa eftir mær, alt sum tú kann
tí at eg teg nú fann
ver nú góður við meg
eg eri góð við teg
Tað er fríggjarakvøld – eg eri í býnum nú
dansi, hoyri tónleik, stuttleiki mær jú
Av og á hyggi eg rundan um meg
so kanska eg kann finna ein mann og siga við nann
Kanst tú koma heim…
Kann eg koma heim við tær i kvøld
– ti at tú ert køld
eg kann hita teg
og verða góður við teg – t-t-t-t-teg
Ansa eftir mær, alt sum tú kann
ti at eg teg nú fann – ja-ja-ja
ver nú góð við teg –
eg eri góður við meg
H-h-h-h-h-h-h-h-h-h-h-h-h-h-heim!!!
7. LIVANDI LJÓS
Lurta her:
Orð, lag, sangur, ljóðføri, synth-solo, útseting: Kári Linderoth Jacobsen
Kór, synth trummur, tónabland, mastering: Óli Poulsen
ISCR FRX871512209
Sangtekstur:
LIVANDI LJÓS
Hyggi inn í eitt livandi ljós
meðan eg hugsi um teg
Login lýsir myrkrið burt
sum tú litar mína tilveru
so fulla av gleði
Hugsi um teg og síggi væl
fyri mær andlit títt
Smílið, tú gevur mær, eigi eg
tað nertir eitt hvat
onkustaðni djúpt inni i mær
Livandi ljós – tú ert ein partur av mini verð
Livandi ljós – tú um kærleika mín óvitandi er
Livandi ljós – eg ræðist tíðina, sum fer, tí
Livandi ljós – eitt ljós má slókna einaferð
Kanska einaferð, tá ljósið slóknað er
svari eg mær sjálvum við ugga
Neyðlovsn er og var
og eg vil tendra teg aftur
men eitt livandi ljós kann ikki tendrast fleiri ferð
8. EYDNAN
Lurta her:
Orð, lag, ljóðføri, sangur, kór, útseting: Elin Brimheim Heinesen
Gittar: Vilhelm Thomsen
Synth trummur, tónabland, mastering: Óli Poulsen
ISCR FRX871512210
Sangtekstur:
EYDNAN
Kom, kom, kom
Yndi títt er burtur
Tú hvarv í mjørkanum,
sum kom úr ongum
Kom, kom, kom
Aftur tú sum var,
Men sum ikki var
Sólarglottin lýsti upp
títt andlit
Eitt sekund helt eg
tú vart til
Men tað vardi bert
eitt lítið bil
Burtur
Burtur
Kom, kom, kom
Longsul mín økist
Men tú flákrar bert
sum ljós í vatni
Kom, kom, kom
Arga meg ei meira
Tú sum einki er,
men tó alt
9. ØGILIGA VÆL
Lurta her:
Orð, lag, útseting: Elin Brimheim Heinesen
Ljóðføri: Elin Brimheim Heinesen, Óli Poulsen
Sangur og kór: Elin Brimheim Heinesen, Kári Linderoth Jacobsen
Saxofon: Allan Tyson
Synth trummur, tónabland, mastering: Óli Poulsen
ISCR FRX871512211
Sangtekstur:
ØGILIGA VÆL
Tú stóð og hugdi at mær so
Eg stóð og hugdi at tær so
At okkurt í mær fór á flog
Okkurt í mær fór eis‘ni á flog
Tú sá meg
Eg sá teg
Og tað var nóg mikið
Soleiðis gjørdust vit so væl
væl, væl, øgiliga væl, ja
Tú kom og bað meg um ein dans
eg kom og bað teg um ein dans
Og tað var gott tú tók ein kjans
tað var gott at eg tók ein kjans
Tú nart við meg
Eg nart við teg
Og tað ….
Vit prátaðu og vóru góð
vit prátaðu og vóru góð
Av tí vit vera aldrin móð
Av tí vera vit aldrin móð
Tær dámdi meg
Mær dámdi teg
Og tað …
Og mong ár gingu
tey gingu alt ov skjótt
men enn er smílið hjá tær
akkurát líka søøøøøøtt
søøøøøøtt
Vit eru bæði saman enn
Vit eru bæði Saman enn
Farin um tey 80 og ongar tenn
Skjótt 90 og bert handilstenn
Tú elskar meg
Eg elski teg
Og tað er nóg mikið
Og tí eru vit so
vææææææææææl
væl enn, grúuliga væl, ja…
10. AFTANÁ
Lurta her:
Orð, lag, ljóðføri, útseting: Kári Linderoth Jacobsen
Sangur og kór: Elin Brimheim Heinesen
Synth trummur, tónabland, mastering: Óli Poulsen
ISCR FRX871512212
Sangtekstur:
AFTANÁ
Aftaná
tøgnin liggur tætt at mær
horvin eru øll andlit nú og láturin
Gott at sita soleiðis
og minnast aftur á eitt kvøld, sum er farið nú
Einsamøll
farið er hvørt menniskja
og eg siti, starandi og hugsandi
Kenslur og tankar nú mala runt í mær
spurningar krevja svar
Eg kenni okkurt fer frá mær
sleppur undan, út millum fingrarnar
Eg rovni og eg fanga tað vil
tó eg veit at, tað ikki ber til
Hesaferð
gjørdist kvøldið øðrvísi
enn eg hevði væntað tað
Eg var ikki búgvin til at kenna hesa nýskapan
– tó at veitslan var góð
Siti her
og fái ikki greiði á
um eg skal flenna ella gráta
inni í mær er alt ein fløkja
mær leingist eftir onkrum, sum eg
ikkl sjálv veit, hvat er
Eg kenni okkurt…
Vónaði, at eg var heppin
men alt gekst ei sum ætlað
Tó eri glað, um at hava teg hitt
tí at tú ert so fitt
Eykalag: HEIMLONGSUL
Lurta her:
Lag, ljóðføri, synth trummur, útseting: Kári Linderoth Jacobsen
Orð, sangur og kór: Elin Brimheim Heinesen
Tónabland, mastering: Jacob Duus, Kári Linderoth Jacobsen
ISCR FRX871512213
Sangtekstur:
HEIMLONGSUL
Nú nærkast aftur tíðin har
vit fara øll at leingjast heim á klettarnar
Og ongin veit at siga nær
vit aftur kenna okkum fylt og mett av tær
Á, Føroyar, tú eigur og dregur okkum øll
noyðir okkum heim aftur til tini prúðu fjøll
Burt vit fara i eyst og vest
men heima man tó vera allarbest
vetur og vár og summar og heyst
vit vitja altíð aftur – um summarið flest
Vit goymdu teg i langa tíð
langt burtur, fjart í minninum, jú, gamaní
men nú vit hava summarfrí
vit tysja øll til oyggjarnar á bygd og bý
Á, Føroyar, tú eigur og dregur okkum øll
noyðir okkum heim aftur til tíni prúðu fjøll
Burt vit fara í eyst og vest
men heima man tó vera allarbest
vetur og vár og summar og heyst
vit vitja altíð aftur – um summarið flest
Kanska vit leggja púrt onki i
leggja onki i, nei, onki í
at tú ert beisk viðhvørt, tá ódnirnar
– tær leika í
ti vit vita væ1, at andlit títt skiftir lit hvønn ein dag
tú aftur verður glað,
føgur og blíð, áðrenn vit fara avstað
Burt vit fara…
