FYRSTA ÚTGÁVAN AV SANGINUM
Sangurin Eitt dýpi av dýrari tíð var ein av best umtóktu sangunum á NALJA-útgávuni hjá Elini & Kára (Elini Brimheim Heinesen og Kára Linderoth Jacobsen). Fyrstu ferð kom útgávan sum kassettuband. Hetta var í 1988. 10 ár seinni gav plátufelagið TUTL so løgini útaftur á fløgu. Tónleikurin var upptikin í Bløndal Studio í Keypmannhavn í 1988. Elin Brimheim Heinesen skrivaði og setti út lagið Eitt dýpi av dýrari tíð.
NARRAÐUR OG VØKUR LIST SPURDIST BURTURÚR
Pápi Elina, føroyski rithøvundurin Jens Pauli Heinesen, skrivaði yrkingina Eitt dýpi av dýrari tíð í 1953 einans 21 ára gamal. Hann var tá forlovaður við eini ungari dámu, Kirstin kallað. Hann var rímiliga vísur í, at hon var tann, hann skuldi vera saman við restina av lívinum, og at tey skuldu giftast. Men eftir at tey høvdu verið saman í tvinni ár, rýmdi hon brádliga frá honum við einum av hansara bestu vinum.
Hann var sera keddur um hetta, so hann setti seg niður at skriva eina yrking. So skuldi ein hildið, at hann skrivaði eina yrking um at vera ólukkuliga forelskaður, men nei. Hann skrivaði um, hvussu dýrabært lívið er, og hvussu nógv lívið er vert at liva hóast avbjóðingar og mótgongd. Hann skrivaði í veruleikanum um vón. Helst fyri at ugga seg sjálvan, men í øllum førum kom ein einastandandi djúp og vøkur yrking burturúr, sum í dag er ein av mest skattaðu sangtekstunum í Føroyum. Nógv halda, at tað er ótrúligt, at ein so ungur maður kundi skriva nakað so djúptøkið og gløgt.
Her er Jens Pauli Heinesen um tað mundið, tá hann skrivaði yrkingina “Eitt dýpi av dýrari tíð”:
SANGURIN Í NÝGGJARI SYMFONISKARI ÚTGÁVU
Tann 10. og tann 17. november í 2002 var ein heimildarfilmur vístur í sjónvarpinum fyristu ferð. Gulla Øregaard hevði gjørt heimildarfilmin um rithøvundin og mannin Jens Paula Heinesen sum ein fagnað av honum í sambandi við, at hann fylti 70 ár 12. november 2002.
Undir tilgongdini at framleiða filmin var ein nýggj útgáva av sanginum Eitt dýpi av dýrari tíð gjørd. Gulla megnaði at fáa fígging til eina symfoniska innspæling, sum hon skuldi brúka til heimildarfilmin, og Elin fekk fatur í danska filmstónaskaldið Søren Hyldgaard, sum hjálpti við at seta tónleikin út fyri symfoniorkestur og manskór. Tónleikurin var partvíst innspældur í Prag í Tjekkinum við City of Prague Philharmonic Orchestra undir leiðslu av Mario Klemens – og partvíst í Havn við Tórshavnar Manskóri undir leiðslu av Bjarna Restorff og við Elini Brimheim Heinesen sum sangsolisti.
Hendan seinna symfoniska útgávan hevur verið á tveimum savnsútgávum – fyrstu ferð í 2003 á eini fløgu, nevnd Popp List 2, útgivin av plátuhandlinum 3’arin og aðru ferð á eini aðrari savnsútgávu við føroyskum kvinnuligum tónlistafólkum, givin út sum ein gáva til haldarar av føroyska kvinnublaðnum Kvinna. Hendan útgávan kom út í november 2004.
Symfoniska útgávan var endurútgivin í november 2023 á eini heildarútgávu við sama heiti – Eitt dýpi av dýrari tíð – í dagførdum tónablandi og mastering.
Sí eisini Elinsa ÚTGÁVUSKRÁ.
